Uova da Raviolo – pasta fyllt með eggjarauðu

Eins og við höfum nefnt áður horfum við á ýmsa matreiðsluþætti í sjónvarpinu. Masterchef Australia hefur t.d. verið í miklu uppáhaldi hjá okkur aðallega vegna þess að þar er maturinn í aðalhlutverki en lítið um rifridli milli þátttakenda. Þar fáum við líka nýjar hugmyndir af mat sem okkur langar að prófa en færsla dagsins er einmitt um þannig rétt.

ravioloeggjarauda

Ravíóló er ravíólí fyllt með ricotta og heilli eggjarauðu. Pastakoddarnir eru síðan soðnir þannig að eggjarauðan er rétt byrjuð að eldast en er samt enn svolítið fljótandi.

Ravíóló (4 stórir pastakoddar)
  • 200 g ferskt pasta
  • 150 g ricotta
  • 45 g af rifnum parmesan osti
  • múskat, salt og pipar eftir smekk
  • 4 eggjarauður

Fletjið pastadeigið út í tvær 50 cm plötur og hafið þær eins þunnar og mögulegt er (hjá okkur stilling 8 af 9 á pastavélinni). Hrærið saman ricotta, parmesan osti, múskat og salt og pipar eftir smekk. Setjið ricotta blönduna síðan í sprautupoka og sprautið 4 hringi á aðra pastaplötuna með gati í miðjunni fyrir eggjarauðuna (passið að hafa bil á milli hringanna).

raviolopasta

raviolodeig2

raviolo3

Brjótið eitt egg í einu og skiljið eggjarauðuna frá eggjahvítunni. Komið eggjarauðunni varlega fyrir í miðjunni á hringnum og endurtakið síðan með hin eggin. Pennslið með hrærðu eggi í kringum hverja fyllingu og leggið síðan hina pastaplötuna yfir. Þrýstið á pastaplötuna svo það lokist vel um hverja fyllingu fyrir sig og reynið á sama tíma að fá sem mest loft úr koddunum. Skerið síðan út 4 pastakodda og setjið á lítinn disk sem búið er að strá smá pastahveiti á. Þrýstið með gafli á endana á pastanu til að tryggja að það haldist lokað. Sjóðið síðan 5 lítra af vatni í stórum potti og saltið vel. Setjið smá olíu út í og rennið síðan koddunum varlega út í vatnið af diskunum og sjóðið í 2,5 mínútu. Veiðið síðan koddana úr pottinum og færið strax á disk.

ravioloeggjarauda2

Við bárum ravíólóið fram með brenndu salvíusmjöri. Það var ljúffengt!

Verði ykkur að góðu!

Pönnupítsur á föstudagskvöldi

Föstudagskvöld eru pítsukvöld hjá okkur en við förum alltaf annaðhvort í pítsu til foreldra Péturs eða búum okkur sjálf til pítsu hérna heima. Síðasta föstudag gerðum við pönnupítsur en þá eru pítsurnar settar á heita steypujárnspönnu og beint inn í sjóðheitan ofn. Pítsubotninn verður vel stökkur en pítsan er samt ótrúlega létt og ljúffeng! pitsaananasbökud

pitsusneid

Það er lykilatriði að setja ekki of mikið á pítsuna og 175 g af áleggi (sósa, álegg og ostur) er algjört hámark. Við gerðum eina margherita pítsu og eina með ananas og skinku. Þær voru báðar ótrúlega góðar.

Pönnupítsa
  • 100 g pítsudeig (við gerðum deigið kvöldið áður en létum það standa við stofuhita)
  • 175 g álegg (pítsusósa, rifinn mozzarella ostur og annað álegg)
  • 85 ml hitaþolin olía

Hitið ofninn í 240-260°C (eins hátt og hægt er). Best er að kveikja á ofninum klukkutíma áður en það á að baka pítsurnar því ofninn þarf að vera mjög heitur. Fletjið pítsudeigið þunnt og látið deigið á pítsuspaða (við eigum ekki þannig en notuðum skurðarbretti í staðinn – þá þarf að passa að hafa hveiti á brettinu). Setjið álegg á pítsubotninn. Hellið olíu á steypujárnspönnu og hitið þar til það rýkur úr olíunni. Látið pítsuna þá renna af pítsuspaðanum á pönnuna (passið ykkur á olíunni því hún er rjúkandi heit!!) og setjið pönnuna strax inn í ofn. Bakið í u.þ.b. 5 min., eða þar til pítsan er tilbúin.

Náið pítsunni af pönnunni og komið henni fyrir á eldhúspappír á meðan hún kólnar örlítið. Skerið síðan í sneiðar og njótið.

pitsaananas

pitsamargherita

pitsamargheritabökud

pitsaskorin

Verði ykkur að góðu!

Dásamlegar ljóskur

Stundum er gott að fá sér eitthvað sætt með kaffinu og síðustu helgi bökuðum við þessar dásamlegu ljóskur (e. blondies). Ljóskurnar geymast vel í frysti og það tekur enga stund að kippa nokkrum ljóskum út úr frystinum ef maður fær allt í einu löngun í eitthvað sætt!

ljoskur1

Ljóskur
  • 115 g smjör
  • 230 g púðursykur (þess vegna verða ljóskurnar ljósbrúnar á litinn)
  • 2 egg
  • 1 tsk vanillusykur
  • 125 g hveiti
  • Börkur af einni appelsínu
  • 1 dl pekanhnetur, hakkaðar gróft
  • 2/3 dl hvítt súkkulaði, hakkað gróft
  • 1/3 dl súkkulaði (mjólkursúkkulaði eða dökkt súkkulaði), hakkað gróft

Klæðið bökunarform með bökunarpappír og hitið ofninn í 180°C. Bræðið smjör og púðursykur. Setjið egg út í og hrærið vel saman. Bætið þá hveiti, vanillusykri, appelsínuberki, hnetum og súkkulaði út í og hrærið vel. Hellið í bökunarformið og bakið í 20-25 min., eða þar til góð skorpa er mynduð og deigið er að byrja bakast í miðjunni. Passið samt að baka ekki of mikið!

ljoskurdeig

ljoskurbakadar

Leyfið að kólna alveg (annars er ekki hægt að skera út bita) og skerið síðan í bita.

ljoskur2

Njótið!

Marokkóskt flatbrauð (Khobz)

Í Marokkó borðuðum við brauð með öllum mat. Brauðin voru sérstök flatbrauð með smá skorpu, svolítið eins og pítubrauð og úr durumhveiti en þó ekki eins þunnt og pítubrauð. Marokkóbúar nota brauðin í staðinn fyrir hnífapör – rífa brauðið í sundur og grípa um matinn með því. Á matreiðslunámskeiði í Marrakech lærðum við að út frá brauðgerð fjölskyldna væri auðvelt að segja til um fjárstöðu þeirra. Fjölskylda sem býr til mörg brauð á hverjum degi á stóra fjölskyldu og á þá nóg af peningum.

flatbraud

Fyrstu dagana okkar í Marokkó fórum við í fjallgöngu og borðuðum fullt af gómsætum marokkóskum mat. Brauðið með matnum var bakað af Berbum í fjallaþorpinu áður en við lögðum af stað í fjallgönguna. Síðustu 3 dagana í ferðalaginu okkar eyddum við Marrakech og fengum þar svipað brauð með öllum mat. Við vorum þó algjörlega á því að brauðið í fjallaþorpinu var betra en brauðið í Marrakech. Brauðið í fjallaþorpinu var nefnilega ekki eins þétt og það var góð skorpa á því.

Marokkóskt flatbrauð (6-8 brauð)
  • 300 g hveiti
  • 100 g fínt durumhveiti
  • 100 g gróft durumhveiti
  • 10 g ferskt pressuger
  • 1 tsk salt
  • u.þ.b. 3 dl vatn, volgt

Öll hráefni í skál og hnoðið þar til deigið er orðið mjúkt og slétt. Leggið rakt stykki yfir og leyfið að standa í a.m.k. 1 klukkustund. Skiptið þá deiginu í 6-8 jafna hluta (eftir því hversu stór brauðin eiga vera) og mótið kúlur. Leggið aftur rakt stykki yfir og leyfið deigkúlunum að hvíla í 30 min. (deigkúlurnar stækka svolítið). Fletjið síðan hverja deigkúlu út í u.þ.b. 1 cm á þykkt, raðið á bökunarplötu með bökunarpappír og leyfið að lyftast í 1 klukkustund.

marokkodeig

marokkodeig2

marokkodeig3

marokkodeig4

Hitið ofninn í 200°C. Þrýstið örlítið niður á brauðin með höndunum til þess að koma í veg fyrir að brauðin breytist í pítubrauð í ofninum og bakið síðan þar til brauðin eru fallega gyllt á litinn. Staflið brauðunum strax upp (þá verða brauðin alveg flöt) og berið fram með góðum marokkóskum mat.

flatbraud2

Verði ykkur að góðu!

Marokkóskar kjötbollur (Kefta) í kryddsósu

Við höfum áður skrifað um að nota heilt lambalæri í meira en eina máltíð. Um daginn keyptum við einmitt læri og erum nú þegar búin að búa til tvær gómsætar máltíðir úr því og eigum samt enn innanlærið eftir. Fyrri máltíðin voru marokkóskar kjötbollur eftir mikla löngun og hugsun til ferðalagsins okkar í Marokkó.

kjotbollur2

Um er ræða frekar einfalda matreiðslu og skemmtilega nýtingu á síðri vöðvum en þar sem kjötið er hakkað er það ótrúlega meyrt og gott. Við hökkuðum því síðri vöðvana af lærinu ásamt þindinni sem var enn á lærinu.

Kjötbollurnar
  • 500 gr lambahakk
  • 2 msk sýrður rjómi
  • 2 tsk paprika
  • 1 tsk malað cumin
  • 1 tsk malaður kóríander
  • 1 tsk kanill
  • 1/4 tsk rifið múskat
  • 1/4 tsk cayenne pipar
  • 2 msk af saxaðri ferskir steinselju og kóríander

Setjið öll hráefni í skál, blandið vel saman og mótið litlar kjötbollur.

kjotbollur1

Sósan
  • 1 rauðlaukur, rifinn í rifjárni
  • 2 msk smjör
  • 4 msk af saffran vatni (4 msk volgt vatn og smá af saffrani)
  • 1 tsk paprika
  • 1/2 tsk malað cumin
  • 1/4 tsk malað engifer
  • 1 dl vatn
  • 4 msk saxaður ferskur kóríander – ekkert að því að nýta stilkana líka.
  • 2 msk sítrónusafi

Setjð öll hráefni nema 1 msk af kóríander og sítrónusafa á stóra pönnu og steikið á meðal háum hita í 10 min. Lækkið niður í meðal lágan hita og bætið kjötbollum út í. Setjið lok á pönnuna og eldið í 30 min. Snúið kjötbollunum eftir 15 min.

Þegar kjötbollurnar eru fulleldaðar bætið þá sítrónusafa út í og salt og pipar eftir smekk. Stráið 1 msk af kóríander yfir og berið fram.

sosa

kjotbollur3

Við borðuðum kjötbollurnar með marokkósku (berber) flatbrauði eins og við fengum í fjöllunum í Marokkó. Uppskriftin kemur í næstu færslu!

Verði ykkur að góðu!

Áramótasteikin

Undanfarin ár höfum við haft matreiðsluna fyrir gamlárskvöld frekar veglega og á því var engin breyting á árinu sem var að líða. Við vorum byrjuð að elda fyrir kvöldið upp úr níu um morguninn og nutum þess að standa í dunda okkur í eldhúsinu allan daginn.

Aðalstjarna máltíðarinnar á gamlárskvöldi var nautasteikin sem var nautaframhryggur á beini (e. rib roast). Við slíka matargerð skiptir gæðin á kjötinu öllu máli og í heimsókn okkar til Dodda í Matarbúrinu í byrjun desember nefndum við þessa steik við hann. Doddi sá um að velja kjötstykkið handa okkur og það fékk svo að þurrhanga hjá honum nánast fram að áramótum. Á gamlársdag var kjötið því búið að hanga í u.þ.b. 6 vikur og leit stórkostlega út – djúprautt og virkilega meyrt.

nautakjot

Matreiðslan á svona fallegu kjöti á ekki að vera flókin. Kjötið var tekið út úr ísskápnum 4 klukkustundum áður en það fór í ofninn til þess að ná stofuhita – enda var það tæp 4 kg. Ofninn var hitaður í 100 °C, salt og pipar á kjötið og kjarnhitamælir stilltur á 50°C stunginn í kjötið. Kjötið fékk síðan að eldast þar til kjarnhitamælirinn hringdi við 50°C en það tók rúma 4 klukkutíma. Þá var kjötið tekið út úr ofninum og við lögðum álpappír og handklæði yfir það. Kjötið heldur þá áfram að eldast og kjarnhitinn hækkaði um heilar 4°C á einum klukkutíma, en það þarf einmitt að leyfa svona stóru stykki að jafna sig í allveg klukkutíma. Að lokum settum við kjötið inn í 250°C heitan ofn til þess að ná góðri skorpu. Það tók tæpar 10 min. hjá okkur.

nauteldad

nautskorid

kjotskorid2

Kjötið var síðan skorið niður í sneiðar og borið fram með soðsósu með mikið af shallotlauk, dijon sinnepi, guðdómlegar pommes anna kartöflur, léttu og fersku waldorfsalati og góðu rauðvíni. Allir voru hrikalega sáttir með matinn!

Gleðilegt nýtt ár!

Beikonsulta

Fyrir þónokkru rákumst við á uppskrift af beikonsultu og hugsuðum með okkur að þetta þyrftum við að prófa. Hvaða tilefni er betri en að leyfa sér svona sælgæti en um jólin?

beikonegg

Það eru til margar útfærslur af beikonsultum. Okkar sulta varð frekar sæt og við vorum virkilega sátt með hana (sem og þeir sem fengu beikonsultu í jólagjöf!) en í næstu tilraun verður prófuð beiskari útgáfa þar sem notað er minna af sykri og síðan er sett sterkt kaffi út í hana líka.

Beikonsulta
  • 500 g þykkt beikon
  • 2 laukar, sneiddir þunnt
  • 1 dl hlynsíróp
  • 1 dl vatn
  • 3 msk balsamik edik
  • 2 msk dijon sinnep
  • 2 tsk Worcestershire sósa
  • salt og pipar eftir smekk

Skerið niður beikon í 1 cm strimla og steikið í góðum þykkbotna potti við miðlungs háan hita í 15-20 min., eða þar til beikonið er að verða stökkt. Hellið helmingnum af fitunni úr pottinum (það má geyma fituna og nota í eitthvað annað). Setjið lauk út í pottinn og steikið í 10 min., eða þar til hann er orðinn vel mjúkur. Látið síróp, vatn, balsamik edik, sinnep og Worcestershire sósu út í og náið upp suðu. Salt og pipar eftir smekk og látið síðan malla í tæpan klukkutíma. Áferðin á sultunni á þá að vera orðin klístuð. Leyfið sultunni að kólna örlítið og komið síðan fyrir í matvinnsluvél. Maukið þar til ásættanleg áferð er náð og hellið sultunni í krukkur.

beikon1

laukurogbeikon

Sultan geymist vel í kæli í mánuð en þegar hún er borin fram þarf að leyfa henni að ná stofuhita fyrst (eða setja hana á heitt brauð). Setjið beikonsultu á gott brauð eða vöfflur og skellið jafnvel steiktu eggi ofan á – það er æðislegt!!

beikonsulta1

beikonsulta2Verði ykkur að góðu!

Bleikir marengstoppar með piparmyntu

Fyrir jólin bökum við nokkrar tegundir af smákökum sem okkur finnst góðar. Hér er ein tegund sem við höfum gert undanfarin ár; bleikir marengstoppar með piparmyntubragði. Uppskriftin er frekar einföld og marengstopparnir geymast vel (ef maður borðar þá ekki strax). Síðan eru þeir líka alveg hrikalega krúttlegir á kökudisknum í desember!

marengstoppar3

Bleikir marengstoppar (u.þ.b. 30 stk)

  • 2 stórar eggjahvítur við stofuhita
  • smá salt
  • 60 g sykur
  • 60 g flórsykur
  • 1/2 tsk piparmyntudropar frá Kötlu
  • u.þ.b. 1 tsk rauður matarlitur

Hitið ofninn í 100 °C án blásturs og setjið bökunarpappír á tvær bökunarplötur. Þeytið eggjahvítur og salt þar til eggjahvíturnar eru loftkenndar (u.þ.b. 1 min). Látið sykur (ekki flórsykur) út í í 3 skömmtum og haldið áfram að þeyta þar til mjúkir toppar myndast í marengsinum. Setjið þá flórsykur og piparmyntudropa út í marengsinn og þeytið örlítið til þess að blanda þessu vel saman. Látið að lokum matarlit í margensinn en hrærið eins lítið og hægt er – liturinn dreifist í sprautupokanum.

marengs

marengslitadur

Setjið marengs í sprautupoka og sprautið litla marengstoppa á bökunarplöturnar. Bakið í u.þ.b. 2 klukkutíma, eða þar til marengstopparnir eru orðnir þurrir og léttir. Leyfið að kólna og njótið síðan.

marengstoppar1

marengstoppar2

marengstoppar4

Verði ykkur að góðu!

Stökkar vöfflur með geri

Það er liðinn alltof langur tími síðan við blogguðum síðast. Nóvembermánuður hefur liðið hratt en við fluttum loksins í íbúðina okkar í byrjun nóvember og síðustu vikurnar hafa farið í að koma okkur almennilega fyrir. Það hefur ekki verið mikill tími til þess að eyða miklum tíma í eldhúsinu undanfarið og enn minna verið um myndatöku af mat.

Um helgina tókum við okkur þó dágóða stund við morgunverðinn og gerðum ljúffengar stökkar vöfflur sem við sáum í Bon Appetit. Vöfflurnar eru ekki eins og hefðbundnu íslensku vöfflurnar; vöffludeigið er gert 8-12 tímum áður en vöfflurnar eru bakaðar og deigið inniheldur ger og brúnað smjör. Vöfflurnar eru ekki sætar og okkur fannst þær því ótrúlega góðar með skinku og osti. Gerið í deiginu gerir það að verkum að vöfflurnar eru einstaklega léttar og stökkar að utan og eru bestar nýbakaðar.

vöfflur1

Stökkar vöfflur með geri

  • 170 g smjör
  • 500 ml mjólk, volg
  • 125 ml súrmjólk
  • 2 msk sykur
  • 20 g ferskt pressuger
  • 1 1/4 tsk salt
  • 350 g hveiti
  • 2 stór egg
  • 1/4 tsk matarsódi

voffludeig

vöfflur2

Bræðið smjör í potti og látið það verða örlítið brúnt. Látið síðan kólna í smá stund. Mjólk, súrmjólk, sykur, ger og salt í skál og hrærið vel. Hellið síðan hveiti og smjörinu út í og hrærið þar til deigið er jafnt. Setjið plastfilmu yfir skálina og leyfið deiginu að standa við stofuhita í 8-12 klukkutíma (Það er kjörið að búa til deigið kvöldið áður og baka síðan vöfflur um morguninn eftir).

Hitið vöfflujárnið. Hrærið egg og matarsóda í deigið og bakið vöfflurnar í heitu vöfflujárninu. Berið fram strax með góðu áleggi.

 

voffluhjarta

Verði ykkur að góðu!

Panang karrí kjúklingur

Um daginn kom yfir okkur alveg svakaleg löngun í einhvern góðan taílenskan rétt enda gott að fá smá hita í sig þegar hitin úti er byrjaður að mælast í bláum tölum.

Þá fór smá rannsóknarvinna af stað og fundum við meðal annars þetta fína taí blog. Þar fengum við fullt af hugmyndum sem var frábært því allar matreiðslubækurnar eru enn í geymslu með restinni af búslóðinni okkar.

Við ákváðum að elda þennan dásamlega og einfalda panang karrí kjúkling og vorum mjög sátt.

panaengkjuklingur

Þegar við höfum eldað taílenskan mat höfum við bæði prófað að búa til okkar eigið karrí mauk (e. curry paste) og að kaupa það tilbúið. Reynslan okkar er sú að ef maður er svo heppinn að finna öll þau hráefni sem eiga vera í maukinu þá getur það verið virkilega gott ásamt því að það er mjög gaman að sjá og fá tilfinningu fyrir hráefnunum í karríinu. Tilbúið karrí mauk er hins vegar alls ekki síðra! Það er margfalt fljótlegra að nota tilbúið mauk, það geymist vel í ísskápnum og svo er það töluvert ódýrara en að kaupa öll hráefnin sjálf. Við notuðum því tilbúið karrí mauk í þetta skiptið.

Panang Karrí kjúklingur
  • 1,2 kg beinlaus kjúklingur skorinn niður í munnbita (við keyptum 2 hæfilega litla kjúklinga og úrbeinuðum – bringurnar og lærin voru notuð og svo eigum við leggi í frystinum)
  • 400 gr kartöflur, afhýddar og skornar í munnbita
  • 1 dl Panang karrí mauk
  • 1 dós kókosmjólk
  • 4 msk ósætt hnetusmjör (t.d. Himneskt gróft hnetusmjör)
  • 2-3 stk jalapeno chilí, skorið niður í þunna strimla
  • 6 kaffir lime laufblöð, frosin eða þurrkuð.
  • 1/2 dl fiskisósa
  • 2 msk pálmasykur (eða púðursykur)

Byrjið á því að steikja karríið og þykka partinn af kókosmjólkinni (það sem er efst í dósinni) á pönnu. Hrærið duglega saman þar til kókosmjólkin byrjar að skilja sig leyfið þá að malla í smá stund.

Hækkið hitann, bætið kjúklingi úti og steikið í smá stund. Bætið því næst restinni af kókosmjólkinni (kókosvatninu) útí ásamt nóg af vatni svo fljóti yfir kjúklinginn. Setjið fiskisósuna og sykurinn úti og náið upp suðu. Bætið kaffir laufum út í. Um leið og suðan er komin lækkið þá hitann og leyfið þessu að malla í sirka 30 mínútúr (þá á kjúklingurinn að vera fulleldaður).

Látið hnetusmjör og chilí í réttinn og hrærið vel. Ef sósan er mjög þunn er gott að þykkja hana með því að sjóða örlítið niður eða bæta smá sósujafnara í sósuna. Fiskisósa og sykur eftir smekk. Berið fram með nóg af hrísgrjónum.

panaeng

Verið ykkur að góðu!