Sticky Buns á laugardegi

Við vorum ansi dugleg um helgina og hjóluðum rúma 45 km. í alls konar veðri. Á laugardaginn bökuðum við alveg hreint syndsamlega góða Sticky Buns, þ.e. kanilsnúðar bakaðir í karamellu og pekanhnetum. Og vá, hvað við vorum sátt með útkomuna!

Í deig fyrir 7 snúða þarf: 1/3 bolli nýmjólk (volg), 2 1/2 msk. sykur, 1 tsk. þurrger (ég notaði þó fersk pressuger), 1 stórt egg,  1 1/3 bolli hveiti, 1/2 tsk. salt og 1/4 bolli mjúkt ósaltað smjör.

Hitið mjólkina örlítið. Hrærið síðan geri og 1 msk. af sykri út í mjólkina og leyfið gerinu að leysast upp í mjólkinni. Bætið þarnæst eggi út í og hrærið. Setjið hveiti, salt, 1 1/2 msk. sykur í skál og hellið mjólkurblöndunni út í. Hnoðið í smá stund. Setjið smjörið út í deigið í nokkrum skömmtum og hnoðið þar til deigið verður teygjanlegt og slétt (tekur sirka 5 min. í hrærivél). Látið deigið í skál og inn í ísskáp í tvo klukkutíma. Eftir tvo tíma í ísskápnum er hægt að fletja út deigið.

Deigið eftir fáar min. / Deigið eftir hnoðun

Það má gera deigið og snúðana kvöldið áður og geyma í ísskápnum yfir nótt. Daginn eftir þarf þá bara taka snúðana út og leyfa þeim að lyfta sér á hlýjum stað í u.þ.b. 2 klukkutíma. Þetta gerðum við og gátum því bakað snúðana um leið og við komum heim úr hjólaferðinni okkar.

Næst þarf að huga að karamellunni því hún þarf að vera orðin köld áður en snúðarnir eru gerðir. Hráefnin í karamelluna eru: 1/4 bolli ósaltað smjör, rúmlega 1/4 bolli púðursykur, rúmlega 1/4 bolli rjómi, tæplega 1/4 bolli hunang, 1/8 tsk. salt og 1/8 tsk. rifinn appelsínu börk (má sleppa en gefur ótrúlega ferskt bragð). Hráefnin í pott og látið karamelluna sjóða í sirka 5 min.

Hellið karamellu í fatið sem þið ætlið að baka snúðana í svo botninn verður þakinn (sirka helmingur af karamellunni) og geymið hinn helminginn af karamellunni því hún fer ofan á snúðana.

Í fyllinguna þarf: 1/4 bolli mjúkt ósaltað smjör, 1/4 bolli púðursykur, rúmlega 1/4 tsk. kanill, 1/4 tsk. múskat og smá salt. Þar að auki tæplega 1 bolli pekanhnetur, hakkaðar og síðan ristaðar í ofni.

Hráefnin í skál og þeytið þar til fyllingin er orðin létt og frekar ljós á litinn. Fletjið út deigið í 5 mm. þykkt, smyrjið fyllinguna jafnt yfir deigið og dreifið 1/2 bolla pekanhnetum yfir. Rúllið deiginu í lengju og skerið í 7 jafna bita.

Dreifið 1/4 bolla pekanhnetum yfir karamelluna í fatinu og raðið snúðunum jafnt í fatið. Snúðarnir mega ekki snertast því þeir stækka mikið! Látið snúðana lyfta sér á hlýjum stað í 2 klukkutíma. Bakið við 180°C í 30-40 min. (fylgist vel með snúðunum eftir 25 min. og passið að baka þá ekki of lengi), eða þarf til snúðarnir eru fallega gylltir og karamellan vel bökuð. Ef snúðarnir verða fljótt dökkir að ofan er fínt að setja álpappír yfir til þess að brenna þá ekki.

Takið snúðana út úr ofninum og leyfið að kólna í smá stund. Hellið karamellu yfir snúðana, pekanhnetum og nokkrum grófum saltflögum.

Namm!

5 thoughts on “Sticky Buns á laugardegi

  1. Ég gerði þessa í dag. Þeir litu svo vel út hjá ykkur að ég stóðst ekki mátið að prófa. Ókosturinn við uppskriftina er tíminn sem lyftingin tekur eða alls 4 klukkustundir svo maður þarf að vera svolítið „invested“. Ég sá ekki heldur við hvaða hitastig snúðarnir áttu að bakast svo ég stillti ofninn á 180 gráður og bakaði þá í 40 mínútur og þeir voru of mikið bakaðir. Hvaða hitastig hentar?
    Þrátt fyrir að snúðarnir hafi verið svolítið brenndir og þurrir þá smökkuðust þeir samt mjög vel svo ég mun prófa aftur! Takk fyrir flotta uppskrift.

    • Takk fyrir það, Drífa. 180 °C er rétt hitastig og ég bæti því snöggast við uppskriftina!
      En leiðinlegt að heyra að snúðarnir voru of mikið bakaðir. Við gerðum snúðana kvöldið áður og geymdum þá í ísskápnum yfir nótt. Það er því mögulegt að þeir hafi enn verið frekar kaldir þegar þeir fóru inn í ofninn og þola þar með lengri bökunartíma. Ef snúðarnir verða fljótt dökkir er gott að láta álpappír yfir svo þeir brenni síður. Ég myndi því byrja á því að minnka bökunartímann, stilla kannski klukku og skoða snúðana eftir 25 min. og meta þá hversu mikið lengur þeir þurfa. Spurning um að bæta því einnig við uppskriftina svo aðrir lendi nú ekki í ofbökuðum snúðum!
      Gangi þér vel🙂

Færðu inn athugasemd

Skráðu umbeðnar upplýsingar að neðan eða smelltu á smámynd til að skrá þig inn:

WordPress.com Logo

You are commenting using your WordPress.com account. Log Out / Breyta )

Twitter picture

You are commenting using your Twitter account. Log Out / Breyta )

Facebook photo

You are commenting using your Facebook account. Log Out / Breyta )

Google+ photo

You are commenting using your Google+ account. Log Out / Breyta )

Tengist við %s