Dásamlegar ljóskur

Stundum er gott að fá sér eitthvað sætt með kaffinu og síðustu helgi bökuðum við þessar dásamlegu ljóskur (e. blondies). Ljóskurnar geymast vel í frysti og það tekur enga stund að kippa nokkrum ljóskum út úr frystinum ef maður fær allt í einu löngun í eitthvað sætt!

Ljóskur

• 115 g smjör
• 230 g púðursykur (þess vegna verða ljóskurnar ljósbrúnar á litinn)
• 2 egg
• 1 tsk vanillusykur
• 125 g hveiti
• Börkur af einni appelsínu
• 1 dl pekanhnetur, hakkaðar gróft
• 2/3 dl hvítt súkkulaði, hakkað gróft
• 1/3 dl súkkulaði (mjólkursúkkulaði eða dökkt súkkulaði), hakkað gróft

Klæðið bökunarform með bökunarpappír og hitið ofninn í 180°C. Bræðið smjör og púðursykur. Setjið egg út í og hrærið vel saman. Bætið þá hveiti, vanillusykri, appelsínuberki, hnetum og súkkulaði út í og hrærið vel. Hellið í bökunarformið og bakið í 20-25 min., eða þar til góð skorpa er mynduð og deigið er að byrja bakast í miðjunni. Passið samt að baka ekki of mikið!

Leyfið að kólna alveg (annars er ekki hægt að skera út bita) og skerið síðan í bita.

Njótið!

Beikonsulta

Fyrir þónokkru rákumst við á uppskrift af beikonsultu og hugsuðum með okkur að þetta þyrftum við að prófa. Hvaða tilefni er betri en að leyfa sér svona sælgæti en um jólin?

Það eru til margar útfærslur af beikonsultum. Okkar sulta varð frekar sæt og við vorum virkilega sátt með hana (sem og þeir sem fengu beikonsultu í jólagjöf!) en í næstu tilraun verður prófuð beiskari útgáfa þar sem notað er minna af sykri og síðan er sett sterkt kaffi út í hana líka.

Beikonsulta

• 500 g þykkt beikon
• 2 laukar, sneiddir þunnt
• 1 dl hlynsíróp
• 1 dl vatn
• 3 msk balsamik edik
• 2 msk dijon sinnep
• 2 tsk Worcestershire sósa
• salt og pipar eftir smekk

Skerið niður beikon í 1 cm strimla og steikið í góðum þykkbotna potti við miðlungs háan hita í 15-20 min., eða þar til beikonið er að verða stökkt. Hellið helmingnum af fitunni úr pottinum (það má geyma fituna og nota í eitthvað annað). Setjið lauk út í pottinn og steikið í 10 min., eða þar til hann er orðinn vel mjúkur. Látið síróp, vatn, balsamik edik, sinnep og Worcestershire sósu út í og náið upp suðu. Salt og pipar eftir smekk og látið síðan malla í tæpan klukkutíma. Áferðin á sultunni á þá að vera orðin klístuð. Leyfið sultunni að kólna örlítið og komið síðan fyrir í matvinnsluvél. Maukið þar til ásættanleg áferð er náð og hellið sultunni í krukkur.

Sultan geymist vel í kæli í mánuð en þegar hún er borin fram þarf að leyfa henni að ná stofuhita fyrst (eða setja hana á heitt brauð). Setjið beikonsultu á gott brauð eða vöfflur og skellið jafnvel steiktu eggi ofan á – það er æðislegt!!

Verði ykkur að góðu!

Bleikir marengstoppar með piparmyntu

Fyrir jólin bökum við nokkrar tegundir af smákökum sem okkur finnst góðar. Hér er ein tegund sem við höfum gert undanfarin ár; bleikir marengstoppar með piparmyntubragði. Uppskriftin er frekar einföld og marengstopparnir geymast vel (ef maður borðar þá ekki strax). Síðan eru þeir líka alveg hrikalega krúttlegir á kökudisknum í desember!

Bleikir marengstoppar (u.þ.b. 30 stk)

• 2 stórar eggjahvítur við stofuhita
• smá salt
• 60 g sykur
• 60 g flórsykur
• 1/2 tsk piparmyntudropar frá Kötlu
• u.þ.b. 1 tsk rauður matarlitur

Hitið ofninn í 100 °C án blásturs og setjið bökunarpappír á tvær bökunarplötur. Þeytið eggjahvítur og salt þar til eggjahvíturnar eru loftkenndar (u.þ.b. 1 min). Látið sykur (ekki flórsykur) út í í 3 skömmtum og haldið áfram að þeyta þar til mjúkir toppar myndast í marengsinum. Setjið þá flórsykur og piparmyntudropa út í marengsinn og þeytið örlítið til þess að blanda þessu vel saman. Látið að lokum matarlit í margensinn en hrærið eins lítið og hægt er – liturinn dreifist í sprautupokanum.

Setjið marengs í sprautupoka og sprautið litla marengstoppa á bökunarplöturnar. Bakið í u.þ.b. 2 klukkutíma, eða þar til marengstopparnir eru orðnir þurrir og léttir. Leyfið að kólna og njótið síðan.

Verði ykkur að góðu!

Rifsberjabaka með óbökuðum marengs

Eitt af haustverkunum í ár var að tína ber af berjarunnum. Rifsberjarunninn hjá mömmu (Péturs) var svo öflugur í ár að þegar búið var að sulta í ársskammt af risfberjahlaupi voru enn töluvert af berjum eftir á runnanum.

Rifsberjahlaup er alltaf gott en okkur langaði samt að prófa eitthvað nýtt, gera eitthvað annað gómsætt úr berjunum. Eftir nokkra leit suðum við saman þessa uppskrift – ljúffeng og falleg rifsberjabaka með óbökuðum marengs. Við munum klárlega endurtaka leikinn næsta haust!

Botn (20-22 cm form)

• 90 g mjúkt smjör
• 50 g sykur
• smá salt
• korn úr 1 vanillustöng
• 1 egg
• 20 g möndlumjöl (malaðar möndlur)
• 160 g hveiti

Látið smjör, sykur, salt og vanillubaunir í skál og hrærið vel saman. Setjið egg út í smjörblönduna og hrærið. Blandið saman hveiti og möndlumjöli. Látið út í smjör- og eggjablönduna og hnoðið þar til deigið helst saman. Látið plast utan um deigið, fletjið örlítið með höndunum og látið inn í kæli í a.m.k. klukkustund.

Fletjið deigið út svo það passi í bökuformið (best að nota form með lausan botn því þá losnar bakan auðveldlega úr forminu). Komið deiginu fyrir í forminu og gatið á nokkrum stöðum með gaffli. Setjið bökunarpappír á botninn og fyllið með þurrkuðum baunum eða leirkúlum. Bakið botninn svona í 10 min, fjarlægið síðan baunirnar/leirkúlurnar og bökunarpappírinn og bakið áfram í ca. 10 min, eða þar til botninn hefur tekið lit.

Rifsberjafylling

• 300 g fersk eða frosin rifsber
• 90 g sykur
• 3 egg
• 3/4 dl rjómi

Skolið berin vel (ef þau eru fersk) og látið í pott. Sjóðið þar til berin í nokkrar min. og notið sleifu til þess að merja berin á meðan svo saftið kreistist úr þeim. Látið saft renna í gegnum sigti og notið sleif til þess að kreista úr hratinu. Úr rifsberjunum fáið þið u.þ.b. 160 g rifsberjasaft.

Sykur og egg í skál og hrærið saman (ekki þeyta því þá myndast loftbólur í fyllingunni). Látið 130 g (geymið rest fyrir marengsinn) rifsberjasaft út í og hrærið vel. Bætið við rjóma að lokum og hrærið þar til blandan er jöfn. Hellið í bökubotninn og bakið við 120°C við blástur í u.þ.b. 30 min, eða þar til fyllinginn er orðin föst. Leyfið að kólna.

Bleikur marengs

• 3 eggjahvítur
• 180 g sykur
• Restin af rifsberjasaftinu

Eggjahvítur og u.þ.b. 60 g sykur í skál og þeytið. Bætið sykur út í hægt á meðan og síðan rifsberjasaftinu. Þeytið þar til marengsinn er orðin vel stífur.

Sprautið marengs á rifsberjabökuna þegar hún er orðin alveg köld. Notið brennara (e. flamer) til þess að brenna marengsinn örlítið (má sleppa) og berið síðan fram.

Verði ykkur að góðu!

Bláberjamúffur

Tveir mánuðir eru liðnir frá því að við blogguðum síðast. Haustið er komið og þótt ekkert hafi verið bloggað þá höfum við nú ekki setið á hakanum. Í sumar ferðuðumst við um Frakkland. Við borðuðum dásamlegan mat og drukkum æðisleg vín – við munum blogga um þetta allt saman við tækifæri en óhætt er þó að segja að þar hafi margar góðar hugmyndir kviknað og verða vonandi framkvæmdar sem fyrst.

Við erum flutt aftur heim til Íslands og höfum notið sumarsins vel. Íslenskt grænmeti, ferskur fiskur og ekki gleyma ófáum nóttum i tjaldinu góða í íslenskri náttúru – það er gott að vera komin heim.

Eitt af því sem við vorum spenntust fyrir við íslenska sumarið í ár var að komast í berjamó. Í ferðalögum okkar um allt land í sumar vorum við stöðugt með augun opin fyrir berjum en berjasprettan fór seint af stað og við tíndum því engin ber.

Síðustu helgi vorum við þó staðráðin í að fara í berjamó þrátt fyrir lélega veðurspá og fréttir um að nánast engin ber væri að finna í ár. Við klæddum okkur vel, tókum með okkur nesti og keyrðum út úr bænum í leit að einhverjum berjum.

Veðrið reynist mun betri en við áttum von á og við fyrstu tilraun fundum við góðan slatta af fallegum aðalbláberjum og fullt af krækiberjum. 3 klukkustundum síðar vorum við komin með 1,5 kg af aðalbláberjum og 2,6 kg af krækiberjum og vorum verulega sátt.

Aðalbláberin eiga fara í sultu og bláberjaleður en úr krækiberjunum munum við búa til krækiberjasaft. Á sunnudaginn gerðum við þessar ljúffengu bláberjamúffur með bláberja ostakremi. Uppskriftin er frá Agnes Cupcakes og er mjög einföld. Múffurnar eru ótrúlega mjúkar og bragðgóðar!

Bláberjamúffur (12 múffur)

• 250 g hveiti
• 250 g hrásykur
• 2 tsk lyftiduft
• 1 tsk salt
• 250 g smjör, brætt
• 4 egg
• korn úr 1 vanillustöng
• 1 dl nýmjólk
• 1 msk appelsínusafi
• 2 tsk rifinn appelsínubörkur
• u.þ.b. 80 g bláber

Látið hveiti, hrásykur, lyftiduft og salt í skál og blandið saman. Mjólk, smjör, appelsínusafi, vanilla og appelsínubörkur í aðra skál og hrærið síðan eggjum út í. Hellið vökva hægt út í hveitiblönduna og hrærið vel. Látið að lokum bláber út í deigið og hrærið varlega.

Látið deigið í sprautupoka og sprautið deig í 12 múffuform. Fyllið formin nánast alveg. Bakið í 15-20 min (mínar þurftu sirka 16 min) við 200°C en passið að bakaðar ekki of mikið því þá verða þær þurrar. Leyfið þeim síðan að kólna alveg.

Bláberja ostakrem:

• 100 g mjúkt smjör
• 100 g rjómaostur
• u.þ.b. 250 g flórsykur
• korn úr 1/2 vanillustöng
• appelsínubörkur eftir smekk
• nokkur bláber

Hrærið saman smjöri og rjómaosti. Látið síðan vanillu, appelsínubörk og bláber út í, og að lokum flórsykur. Þeytið þar til kremið er mjúkt og loftkennt (ef kremið er of þunnt þarf meiri flórsykur).

Notið sprautupoka til þess að sprauta krem á múffurnar og skreytið með bláberjum.

Verði ykkur að góðu!

Sjónvarpskaka með marsípani

Sjónvarpskaka er sígild kaka sem flestir þekkja og er ofboðslega góð ef kakan er nógu létt, mjúk og með nóg af kókoskaramellubráð ofan á. Um helgina bökuðum við sjónvarpsköku til þess að hafa með kaffinu og prófuðum að setja rifið marsípan í deigið. Það var ótrúlega gott og maður fann alveg bragðið af marsípaninu sem passaði ótrúlega vel við kökuna.

Það er ekki mikið mál að skella í eina sjónvarpsköku og tekur undir klukkustund. Aðalmálið er að bíða eftir því að kakan verður orðin nógu köld svo hægt sé að borða hana án þess að brenna sig! Mamma gerði oft sjónvarpsköku þegar ég var lítil og hún setti alltaf haframjöl á móti kókosmjölinu í kókoskaramellubráðinni og mér finnst það virka vel. Kókoskaramellubráðin er því með kókosmjöli og haframjöli hér.

Sjónvarpskaka með marsípani

• 125 g hveiti
• 25 g smjör
• 100 g sykur
• 50 g rifið marsípan (ren rå marcipan med 60% mandler frá Odense Marcipan)
• 2 egg
• 1 dl nýmjólk
• 1 1/4 tsk lyftiduft
• baunir úr 1/2 vanillustöng

Hitið ofn í 200°C. Þeytið saman egg, vanillubaunir og sykur. Setjið hveiti, lyftiduft og rifið marsípan út í eggjablönduna og hrærið örlítið. Látið mjólk og smjör í pott og náið upp suðu. Hellið þá strax í deigið og hrærið vel. Látið í smurt kökuform og bakið í 15-20 min , eða þar til kakan er bökuð í miðjunni (fer eftir stærðinni á forminu). Það er mikilvægt að baka kökuna ekki of mikið því þá verður hún þurr en hún má auðvitað heldur ekki vera óbökuð.

Kókoskaramellubráð

• 150 g smjör
• 150 g kókosmjöl
• 50 g haframjöl
• 250 g púðursykur
• 50 g sykur (má sleppa og nota þá 300 g púðursykir allt í allt)
• 3/4 dl mjólk
• 2 tsk vanillusykur

Látið hráefnin í pott og hitið þar til úr verður falleg karamellubráð. Hellið yfir kökuna og bakið í 5-10 min, eða þar til karamellubráðin er fallega gyllt á litinn. Leyfið að kólna og njótið síðan.

Verði ykkur að góðu!

Brioche au chocolat

Um helgar finnst okkur gott að búa til góðan morgunverð og eyða dágóðri stund við morgunverðarborðið. Við fáum okkur alltaf góðan espressóbolla og yfirleitt ristað brauð og ávexti. Á laugardaginn langaði okkur í eitthvað sætt með morgunkaffinu og því skelltum við í brioche brauð með súkkulaði og vanillufyllingu. Það var sko alls ekki slæmt!

Við byrjuðum reyndar á deiginu kvöldinu áður því það þarf að standa í ísskápnum yfir nótt. Ástæðan er sú að deigið er mjög blautt útaf smjörinu í því en þegar það fær að kólna í ísskápnum yfir nótt verður deigið viðráðanlegt. Hvíldin í ísskápnum hefur eflaust líka áhrif á bragðið af brauðinu en það er alveg hreint dásamlegt.

Brioche brauð er líka fullkomið í franskt eggjabrauð (e. French toast) þar sem það sýgur eggjablönduna vel til sín og er létt og gott. Við notum einnig brioche brauð sem hamborgarabrauð þegar við gerum The Camelot eða The Miss Daisy frá síðunni cheeseandburger.com. Þá er bara að móta hamborgarabrauð eða baka brauðið í brauðformi í staðinn.

Brioche au chocolat (u.þ.b. 8 stk)

• 200 g hveiti
• 3/4 tsk salt
• 10 g ferskt pressuger
• 1 msk sykur
• 1/2 dl volg mjólk
• 2 egg
• 50 g mjúkt smjör

Setjið ger, salt, sykur og mjólk í skál og hrærið saman. Látið síðan hveiti út í og hnoðið örlítið. Setjið síðan eitt egg út í deigið í einu og hnoðið þar til allir hekkir eru horfnir. Haldið áfram að hnoða og bætið smjörinu við í nokkrum umferðum og hnoðið þar til deigið er slétt og teygjanlegt. Smyrjið skál með smá olíu (þá er auðveldara að ná deiginu úr skálinni síðar) og látið deigið í skálina. Breiðið yfir deigið og geymið í ísskáp yfir nótt.

Fyllingin er vanillukrem og dökkt súkkulaði. Vanillukremið þarf að vera kalt þegar það er notað en það er ekkert mál að gera það kvöldið áður og geyma það í ísskáp yfir nótt.

Vanillukrem

• 2 1/2 dl nýmjólk
• 50 g sykur
• 2 egg
• baunir úr einni vanillustöng
• 2 msk maizenamjöl (til þess að þykkja kremið)

Setjið 2 dl af mjólk, sykur, egg og vanillubaunir í pott og hitið á vægum hita. Hrærið saman 1/2 dl af mjólk og maizenamjölið og látið síðan út í pottinn. Sjóðið kremið á vægum hita þar til kremið er orðið hægilega þykkt. Hrærið vel á meðan! Kælið kremið.

Fletjið út deigið frekar þunnt (það lyftist mikið í ofninum!) og skerið út ferkönntuð stykki. Þið ráðið sjálf stærðinni. Sprautið rönd af vanillukremi öðru megin á deigið og stráið yfir dökkt súkkulaði eftir smekk. Brjótið deiginu saman svo fyllingin sjáist ekki og leyfið að lyfta sér á hlýjum stað í 30 min.

Penslið með eggi og bakið síðan við 200 °C þar til fallega gyllt á litinn.

Njótið!

Belgískar vöfflur með skinku og osti

Við hjónin vorum í dásamlegu fríi á Íslandi um páskana. Við fórum í fjallgöngur, lágum í heita pottinum á hverjum degi og borðuðum gómsætan mat með fjölskyldunni. Einn morgunninn gerðum við belgískar vöfflur sem við sáum í Bon Appetit fyrir u.þ.b. ári síðan og þær slógu svo sannarlega í gegn! Vöfflurnar eru svokallaðar Brussels vöfflur, þær eru stökkar að utan en léttar og loftkenndar að innan. Við settum síðan skinku og cheddar ost á vöfflurnar og það var ljúfengt.

Belgískar vöfflur (12 stk)

• 220 g hveiti
• 1 msk sykur
• 2 tsk lyftiduft
• 1 tsk matarsódi
• 1 tsk salt
• 3 stór egg, eggjahvítur og eggjarauður í sitt hvoru lagi
• 200 g brætt smjör
• 225 ml ab-mjólk
• 200 ml sódavatn
• Góð skinka, skorin í bita
• Cheddar ostur, rifinn

Setjið hveiti, sykur, lyftiduft, matarsódi og salt í skál. Stífþeytið eggjahvítur og geymið. Hrærið saman eggjarauður, brætt smjör, ab-mjólk og sódavatn í skál og blandið síðan við hveitiblönduna í nokkrum umferðum þar til deigið er fallega slétt. Setjið síðan eggjahvítur út í og blandið þessu vel saman.

Hitið vöfflujárnið og látið eina ausu af deigi í járnið (magn fer auðvitað eftir stærðinni á vöfflujárninu). Stráið u.þ.b. 1 msk af skinku og 1 msk af rifnum osti yfir deigið. Bakið þar til vafflan, osturinn og skinkan er stökk.

Við borðuðum vöfflurnar með örlítið af smjöri og maple sírópi. Þvílíkt sælgæti!

Verði ykkur að góðu!

Hveitilaus súkkulaðikaka og 1 árs afmæli

Bloggið varð 1 árs í síðustu viku og Pétur varð 31. Húrra húrra!

Pétur var þó veikur alla vikuna og því vorum við frekar róleg á afmælisdeginum sjálfum. Um helgina, þegar heilsan var öll að koma til, elduðum við ljúffenga uxuahalasúpu (sjá uppskriftina hér) og hveitilausa súkkulaðiköku í eftirrétt. Kakan er algjört lostæti en er mjög rík af súkkulaði. Til þess að vega á móti súkkulaðinu gerðum við mascarponerjóma sem við bárum fram með kökunni.

Hveitilaus súkkulaðikaka

• 55 g smjör
• 90 g sykur
• 150 g dökkt súkkulaði (við notuðum 70%), saxað
• 1 msk olía
• 3 stór egg
• 1 msk gott ósætt kakóduft (e. natural unsweetened cacoa)
• 1/2 tsk vanilludropar
• smá salt

Hitið ofninn í 180 °C. Smyrjið 22 sm form og stráið sykri í formið, hristið forminu svo sykur dreifist jafnt og hellið síðan eins mikið af lausum sykri og hægt er frá. Geymið formið.

Setjið súkkulaði, olíu og 55 g af smjöri í skál og bræðið yfir vatnsbaði. Takið skálinu af hitanum.

Brjótið 2 egg og látið eggjarauður og eggjahvítur í sitt hvoru skálina. Geymið skálina með eggjahvítunum en setjið kakóduft, vanilludropa, salt, 30 g af sykri og 1 egg í skálina með eggjarauðunum. Hrærið vel og hellið síðan blöndunni hægt út í brædda súkkulaðið og hrærið þar til blandan er slétt og falleg.

Stífþeytið eggjahvíturnar og hellið síðan 60 g af sykri (restin af sykri) út í og þeytið þar til stífir toppar myndast. Blandið marengsnum saman við súkkulaðiblönduna og hellið deiginu síðan í smurða formið. Stráið 1 msk af sykri yfir deigið og setjið inn í ofn.

Bakið þar til kakan er farin að losna frá köntunum í forminu og smá sprunga myndast á toppi kökunnar (þetta tók um 25 min hjá mér). Leyfið kökunni að kólna.

Mascarponerjómi

• 2 dl rjómi
• 1 dl mascarpone ostur

Setjið rjóma og mascarpone í skál og stífþeytið. Berið fram með súkkulaðikökunni.

Verði ykkur að góðu!

Bananabrauð

Við áttum nokkra banana sem voru orðnir aðeins of þroskaðir. Við ákváðum að nota þá í bananabrauð sem við sáum í Bon Appétit en þetta er besta bananabrauð sem við höfum smakkað! Ótrúlega létt, mjúkt og dásamlegt með fínu bragði af bönunum. Uppskriftin er ofboðslega einföld og brauðið helst mjúkt og gott í nokkra daga.

Bananabrauð

• 4 dl hveiti
• 1 1/2 tsk matarsódi
• 3/4 tsk salt
• 3 stór egg
• 3 dl sykur
• 2 stórir bananar, vel þroskaðir og sætir
• 1 1/2 dl olía

Setjið hveiti, matarsóda og salt í skál og hrærið saman. Látið egg, sykur, olíu og banana í aðra skál og hrærið vel. Látið hveitiblöndunni út í og hrærið.

Hellið deiginu í smurt brauðform og bakið við 180 °C þar til brauðið er bakað í miðjunni. Það tekur u.þ.b. 60 min.

Leyfið brauðinu að kólna aðeins í forminu áður en þið reynið að losa það úr forminu.

Verði ykkur að góðu!